SHOLAT FARDU
Dupi sholat anu diwajibkeun atanapi sholat fardu eta aya 5 waktos :
⦁ Sholat subuh,sadayana 2 rakaat,dupi lebet waktosna nyaeta : tingawitan bijil fajar sidik dugikeun ka bijil sarangenge (panon poe).
⦁ Sholat dzuhur, sadayana 4 rakaat, dupi lebet waktosna nyaeta : tingawitan lingsir panon poe dugi ka jadina kalangkang saban – saban perkara sarua ukuranana sareng eta perkara bari langkung sakedik.
⦁ Sholat ashar, sadayana 4 rakaat, dupi lebet waktosna nyaeta : tingawitan saba’da seepna waktos dzuhur dugi ka surupna sarangenge.
⦁ Sholat magrib, sadayana 3 rakaat , dupi lebet waktosna nyaeta : tingawitan surupna sarangenge dugikeun ka bijilna mega beureum.
⦁ Sholat isya, sadayana 4 rakaat, dupi lebet waktosna nyaeta : tingawitan saba’da seepna waktos magrib (bijil mega beureum) dugi ka bijilna fajar sidik anu mangrupi ngawitan lebetna waktos sholat subuh.
Dupi pangutamana amal ibadah nyaeta : gagancangan ngalakonan sholat dina awal ngawitan lebet waktosna sholat, saupami mayunan ngalakonan sholat sateuacan lebet waktosna atanapi ngalakonan sholat parantos akhir waktosna sumawonna ninggalkeun sholat,eta ka lebetkeun tina sapalihna dosa gede.
Dupi waktos anu diharamkeun ngalaksanakeun sholat eta aya diwaktos 5 tempat :
⦁ Haram sholat dina saba’da sholat subuh dugi ka bijil sarangenge (panon poe)
⦁ Haram sholat dina waktos sarangenge ukuran satumbak dina paningal panon.
⦁ Haram sholat dina nalika sarangenge wanci manceran salian dina dinten jum’at.
⦁ Haram sholat dina saba’da sholat ashar (ba’diyah).
⦁ Haram sholat dina wanci sariak layung dugi ka surupna sarangenge atanapi lebet waktos magrib.
Dupi syarat wajibna sholat eta aya 3 perkawis dina hartos hiji jalmi tos keuna ku kawajiban kedah ngalakonan saupami tos kaliputan ku 3 syarat anu diantawisna nyaeta :
⦁ kedah islam, teu wajib sholat pikeun jalmi kafir sanajan sholat moal menang ganjaran, da wajibna kedah lebet islam heula, bari teu wajib ngodoan sholat salami kafirna saupami lebet islam.
⦁ Kedah baleg, teu wajib sholat ka murang kalih tapi wajib diajarkeunana, pikeun sepuhna wajib miwarangna dina wates yuswa putrana 7 taun, kedah neggelna kanu teu kersa sholat saba’da yuswa 10 taun kalawan nenggel sakira – kira teu matak cidera atanapi bohak.
⦁ Kedah gaduh akal sehat, teu wajib sholat kajalma gelo, teu wajib ngodoan sholatna saupami damang dina gelona.
Dupi cirina baleg atanapi tandana jalmi parantos baleg eta aya 3 perkawis :
⦁ Saupami parantos sampurna umur 15 taun kanggo istri sareng pameget.
⦁ Saupami parantos ngimpen jima kanggo istri sareng pameget dina wates umur 9 taun kaluhur.
⦁ Saupami parantos kaluar getih haed kangge istri ungkul tina batas umur 9 taun kaluhur.
Dupi syarat syahna sholat eta aya 5 perkawis nyaeta :
⦁ Kedah suci anggota badan tina hadas 2 nyaeta hadas alit sareng hadas ageung.
⦁ Kedah suci tina najis dina badan,dina pakean sareng dina tempat sholat.
⦁ Kedah nutupan aurat ( dupi aurat anu pameget kedah katutupan dina nalika sholat nyaeta perkara anu aya dina antara udel sareng tuur,dupi auratna istri dina nalika sholat eta sadaya anggota badan salian raray sareng dampal panangan dua).
⦁ Kedah mayun ka kiblat.
⦁ Kedah tos lebet waktosna sholat anu di fardukeun.
Dupi hadas eta kabagi 2 bagian :
⦁ Anu disebat hadas alit, nyaeta perkara anu ngawajibkun kana wudlu tegesna sakur perkara anu ngabatalkeun kana wudlu.
⦁ Anu disebat hadas ageung, nyaeta sakur perkara anu ngawajibkeun kana adus (mandi wajib).
Dupi najis numutkeun ukuran dina cara nyucikeunana eta ka bagi 3 bagian nyaeta :
⦁ Najis mugholadoh tegesna berat nyucikeunana
⦁ Najis muhofafah tegesna hampang nyucikeunana
⦁ Najis mutawasitoh tegesna pertengahan antara berat sareng hampang dina cara nyucikeunana.
⦁ Dupi perkara anu disebat najis mugholadoh nyaeta : najis anjing sareng babi,naon bae perkara dina sakujur anggota badanna eta dihukuman najis, cara nyucikeunana kedah kucai 7x kumbahan ,dina salah sahijina kedah dicampur taneuh.
⦁ Dupi perkara anu disebat najis muhofafah nyaeta : cai papang murang kalih pamegeut anu teu acan umur 2 taun bari teu acan ngaemam nananon salian ti cai susu ibuna,cara nyucikeunana cekap kungabanjurkeun cai kana eta najis.
⦁ Dupi perkara anu disebat najis mutawasitoh nyaeta : salian ti najis mugholadoh sareng najis muhofafah anu jenisna seeur anu diantawisna sakur – sakur bangke salian bangke jalmi,bangke simet sareng bangke lauk caina.
Dina jenis najis mutawasitoh eta ka bagi kana 2 bagian :
⦁ Najis mutawasitoh bangsa aeniyah nyaeta : najis anu aya rupana,aya rasana aya ambeuna atawa salah sahijina,cara nyucikeunana teu meunang henteu kedah dikumbah ku cai dugi ka leungit rupana,rasana sareng ambeuna eta najis saba’da miceun bentukna najis.
⦁ Najis mutawasitoh bangsa hukmiyah nyaeta najis anu hanteu aya rupana,teu aya rasana sareng hanteu aya ambeuna .tegeusna teu aya sadayana sapertos cai papang jalmi atawa sato anu atos garing. Cara nyucikeunana cekap ku ngabanjurkeun cai kanu eta najis.
